Kriza e blegtorisë, importet e bulmetit u rritën me 62 për qind ndërmjet 2021-2025
Importet e produkteve bulmetore u rritën me 62% nga viti 2021 në 2025, duke reflektuar tkurrjen e prodhimit vendas dhe varësinë në rritje nga tregjet e huaja.
Bilanci tregtar i Shqipërisë për produktet e shportës ushqimore po tregon një varësi gjithnjë e më të theksuar nga importet. Sipas të dhënave të INSTAT, vlera e importeve të kategorisë “Produkte bulmetore, vezët dhe mjalti” arriti në rreth 7.7 miliardë lekë në vitin 2025, nga 6.8 miliardë lekë në vitin 2024, me një rritje vjetore prej rreth 14%.
Në një horizont më afatgjatë, rritja është edhe më domethënëse. Krahasuar me vitin 2021, importet e kësaj kategorie janë rritur me 62%, duke sinjalizuar humbjen graduale të peshës së prodhimit vendas përballë produkteve të importuara nga Rajoni dhe Bashkimi Evropian.
Blegtoria në tkurrje të vazhdueshme
Zgjerimi i importeve lidhet drejtpërdrejt me krizën strukturore të sektorit të blegtorisë. Numri i krerëve ka rënë vit pas viti, si pasojë e braktisjes së zonave rurale, plakjes së popullsisë dhe mungesës së interesit të të rinjve për fermat familjare.
Njëkohësisht, rritja e kostove të inputeve bujqësore dhe e bazës ushqimore ka shtrenjtuar prodhimin vendas, duke e bërë atë pak konkurrues ndaj produkteve të huaja, të cilat përfitojnë nga subvencione dhe teknologji më efikase.
Importi më i leverdishëm se prodhimi vendas
Forcimi i lekut ka ulur ndjeshëm koston e importeve të qumështit, djathit dhe gjalpit nga vendet e BE-së. Për tregtarët, importi nga Italia apo Hungaria është bërë më ekonomik sesa grumbullimi i qumështit vendas, i cili shoqërohet me kosto të larta logjistike.
Kërkesa e qëndrueshme e brendshme dhe rritja e konsumit nga turizmi po mbulohen gjithnjë e më shumë nga produktet e importuara, duke thelluar hendekun mes prodhimit vendas dhe tregut.
Rreziku për sovranitetin ushqimor
Ekspertët paralajmërojnë se, nëse ky trend vijon edhe pas vitit 2025, Shqipëria rrezikon të humbasë sovranitetin ushqimor në produktet bazë të bulmetit. Rritja e importeve me rreth 10 milionë euro brenda një viti tregon se politikat aktuale të mbështetjes nuk kanë arritur të ndalin tkurrjen e sektorit të blegtorisë.
